I full gang med mai
06.05.12 Marsjmånaden er i full gang, og to speling i Sandane sentrum og på Breimstafetten er gjort. Kaldt og småvått ver stoppar ikkje oss, og no er det 17. mai neste. Det vert endringar i oppstart på dagen. 17. mai-komieten på Sandane ønskjer ikkje marjsering og speling til flaggheising klokka åtte, men utset heile seremonien til starten på barnetoget. Dermed er oppmøte flytta frå 07.00 til 08.30 og inntil ny beskjed møter vi ved Aulaen på Firda vgs.

VIKTIG MELDING
26.04.12 Tidleg i mai flyttar janitsjaren inn på sitt nye domene - gloppenjanitsjar.no . Deretter vil dette domenet med .net truleg verte stengt i løpet av sommaren, i alle fall vil det ikkje verte oppdatert. Ei periode framover vert begge domena oppdatert.

Fin påskebasar
14.04.12 Det vart på alle måtar ein hyggeleg påskebasar i Breim. Janitsjaren takkar alle som støtta oss. 

Alt klart for påskebasar
29.03.12 Vi er no klare for vår årlege påskebasar i Breimshallen. Tysdag i påskeveka - 3. april - vert det flotte vinstar, god musikk, kaffi og kaker som vanleg når janitsjaren inviterer til basar. Dørene opnar klokka 1900. Velkomne!

Høyr lyden av Skotårsgalla 2012
20.03.12 No kan du omsider høyre opptak frå Skotårsgalla 2012 på her på nettsida. Gå inn på vår musikalske side, så finn du heile konserten, i alle fall ei stund framover. Opptak er opptak, men det gjev i alle fall eit bilete.


Gloppen janitsjar og Nordic Tenors med Roald Haarr, Sveinung Hølmebakk og Jan-Tore Saltnes i storslag. (Foto Ole Kristian Solheim Gjerløw)
Ein konsert vi er stolte av
04.03.12 Dagen vi har arbeidd fram mot kom omsider, og vart alt for kort. To sitrande fine konsertar saman med Nordic Tenors, den siste avslutta med eit heidundrande fyrverkeri. Publikum var med og etterpå vart det særs mykje godord å få. Nærare 450 tilskodarar var på plass, og når dei er stornøgde og vi er stornøgde, då har vi gjort ein Skotårsgalla som er eit skotår verdig. Sjå Firda Tidend «Eit show av det sjeldne slaget».


Då er vi klare til galla
02.03.12 Siste gjennomkøyring og samspeling i kveld, finstasen er prøvespelt og tenorane på plass. Vi gler oss og ønskjer alle hjarteleg velkomne til skotårsgalla. Det vert sprudlande friske forfriskningar i pausen, og kvelden vert avslutta med gallafyrverkeri - også ute.

Vigdis og Margunn attende i styret
06.02.12 Vi fekk ny nestleiar og ny kasserar etter årsmøtet onsdag. Vigdis og Margunn tek over etter Gunnar og Reidunn som begge har gjort flott arbeid i to periodar. Det vart også eit byte i noteutvalt Olav R. inn for Torgrim. Elles er det eit solid og stabilt korps, Gloppen janitsjar.

Velspelt og underhaldande av husorkester på hotellet

28.02.12 At vi har eit kapabelt husorkester i eigne rekker visste vi, frå alle jule- og påskebasarane våre, og på hotellet fekk dei vist fullt ut at dei kan stå for flott musikk. Det vart meir ein konsert enn taffel, og det er ikkje tvil at dette er så godt at vi glatt kan ta igjen salet.  

Vellukka øvingshelg
15.01.12 Etter tre dagar intensiv øving byrjar no fest- og gallastemninga å sette seg i korpset. Korpset er godt i rute, og gler seg til å møte dei tre tenorane og eit jamnt aukande tal publikum. Billettar til storhende er å kjøpe på Billettluka.

Innkalling til årsmøte
14.01.12 Medlemmar i Gloppen janitsjar vert kalla inn til årsmøte den 1. februar klokka 20.00. Det vert vanlege årsmøtesakar, og om medlemmar har ei sak eller saker dei vil ha opp på årsmøtet må det vere meldt styret innan 24. januar.

Nyttårsfest med janitsjar-taffel
05.01.12 Laurdag 21. januar inviterer Gloppen hotell til nyttårsfest med fire rettar middag, Gloppen janitsjar og dans. Janitsjaren stiller med sitt eminente husorkester og er godt i gang med å tilberede ein lettare musikalsk meny for kvelden.

-   -   -   -   -

Tidlegare nyhende: Nytt og hendingar i 2011
Tidlegare nyhende: Nytt og hendingar i 2010
Tidlegare nyhende: Nytt og hendingar i 2009

Til toppen